sHaBaB mo5talif

We Do ouR BeSt to Be tHe BeSt
 
HomeHome  PortalPortal  FAQFAQ  SearchSearch  RegisterRegister  MemberlistMemberlist  UsergroupsUsergroups  Log in  

Share | 
 

 7ekayti ma3 7'orag el zayda

Go down 
AuthorMessage
M@Doo

avatar

Number of posts : 8
Age : 27
Registration date : 2007-08-10

PostSubject: 7ekayti ma3 7'orag el zayda   Fri Aug 31, 2007 2:05 am

حكايتى مع الخراج اللى فى الزايدة

البدايه يا اولاد كانت يوم نزلنا نتفرج على ماتش السوبر بتاع الاهلى والاسماعيلى ويا ريتنى مانزلت الحمدلله كسبنا خلاص هنروح حبكت الفجعنه علينا وضربت انا و واحد صاحبى ساندويتش من عند سامى تلوث الله يخرب بيته وبيت اللى جابوه ابن ال Evil or Very Mad ...تيييييييييييت...... Evil or Very Mad ولا حرام برضه المهم اكلت الساندويتش المتين وشبعت الحمد لله وروحت .. ونمت .. وصحيت .. بليل بقى وانا بكلم عم عطيه وبنعمل المنتدى الجميل ده Smile مقولكمش عاللى حصللى لقيت بطنى هتنفجر من الوجع لدرجه انى كنت بتشقلب bounce عالسرير وزى ما اكون واخد سم واحد رخم هيقولى انت جربت السم قبل كده هرد عليه واشتمه .!!



اليوم اللى بعديه بطنى لسه واجعانى والجنان بقى انى برضه نزلت مع اصحابى وانا تعبان رجعت بقى مرمى عالسرير بلا حركه ودرجه الحراره 39 Embarassed وشويه قمت مديها كمادات وقلت ده وجع عادى...

اليوم اللى بعديه رحت للدكتور وياريتنى مارحتله كان دكتور حمار albino اسمه الحارونى هو باين من اسمه اساسا كشف عليا وقاللى التهاب فى المصران وكتبلى شويه ادويه ملهاش لزمه يعنى مسكن وخافض للحراره المهم مشيت عالادويه ومفيش تحسن No رحتله الاستشاره من غير ما اخد الدواء كنت هاخده لما اروح عادى يعنى قام مزعق واتنرفز آل يعنى القرص ده هو اللى كان هيخففنى بيقوللى الدوا فاضل فى قد ايه قلتله مش عارف فى حد بيديهولى عشان انا على طول نايم ومبقومش قام متنرفز آل يعنى لو خدت انا الدوا هخفLaughing ..



بس متخافوش هو الدكتور ده اللى بيروحله استشاره من غير ميخف بيزعقله اوعوا تخافوا منه يعنى ..

طبعا رحت لدكتور تانى محترم كشف عليا طلب اشعه وتحليل دم عملت التحليل والاشعه قال دى زايده مزمنه وكانت المفاجأه انه لازم عمليه .. affraid أن أن أن آآآآآآآآآآآن




يوم التلاتاء رحت المستشفى الساعه 9 عملولى العمليه على طول على الساعه 2 Razz كده دخلت اوضه العمليات انا بصراحه كنت فاكر نفسى مش هنام من البنج بس خسرت التحدى هى الاوضه كانت كلها دكاتره بس ستات لدرجه انى افتكرت نفسى فى حمام البنات ادونى حقنه البنج وقعدو يسالونى شويه وفى واحده لقيتها بتقولى شاب وسيم انا قلقت Rolling Eyes قلت هيستفردوا بيا وسالونى دخلت كليه ايه وبتاع عشان انام وانا عمال ارد عليهم قامت الدكتوره قالتلى انت منمتش ليه احنا اديناك بنج Very Happy ههههههههه Very Happy زهقت منى لحد مالجزار قصدى الدكتور دخل قام اول ما دخل قال ايه ده انت لسه صاحى نام ياللا قمت نايم Sleep بس اخر حاجه فاكرها انهم حطولى البتاعه بتاعت التنفس دى ومعرفش ايه اللى حصلconfused ...


to be continued
Back to top Go down
View user profile
M@Doo

avatar

Number of posts : 8
Age : 27
Registration date : 2007-08-10

PostSubject: Re: 7ekayti ma3 7'orag el zayda   Fri Aug 31, 2007 2:23 am



بعد كده صيت لقيت نفسى فى اوضه الافاقه عمال اقول تعباااان وفى واد مش فاكر اسمه تقريبا ادهم عمال يعيط تقريبا ضحيه من ضحايا الجزار زيي المهم نمت تانى صحيت لقيت نفسى فى الاوضه نايم عالسرير مش قادر اتحرك ببص على بطنى لقيتها متغطيه بنص كيلو قطن وبلاستر وكده وطالع منى خرطوم متتخضوش اه والله خرطوم كان جو بطنى متوصل بعلبه بلاستيك عشان ينزل فيها الصديد نسيت اقوللكوا ان انا صايم قبل العمليه بيوم الساعه 3 بليل وممنوع ان انا اشرب ولا اكل حتى بعد العمليه قلت استحمل, اصحابى جم وقعدت معاهم ومشيوا وانا لسه صايم كل اللى باخده جلوكوز انا بقى مكنتش عارف الجلوكوز ده الناس بتاخده من دراعها ازاى بس عرفت وياريتنى ما عرفت اقولكو ازاى بيجيبوا بتاعه كده عامله زى الابره بس تخينه ويدبهوا فى اى عرق عندى ويوصلوها بكيس الجلوكوز تانى حاجه لازم بعد العمليه اقو امشى شويه لقيت بقى ممرضه هما كلهم شبه بعض قصيرين ومبططين وانا اللى كنت فاكر هلاقى مزز زى الافلام الابيض واسود بتاعت زمان المهم لقيتها جايه

بتقوللى انت قمت اتمشيت

قلتلها : لأ

قالتلى انت كسلان دانا لما ولدت قيصريه قمت بعديها بساعه -معرفش ازاى-

قلتلها انا مولدتش والله

قامت تانيه السرير بنت ال ...تيييت .. هى كمان وانا مبعرفش اتنى بطنى ساعتها وقالتلى ابقى قوم ومشيت

قمت اتمشيت بعد معاناه ومعاونه من الاصدقاء والوالدين ورجعت نمت ..

اليوم التانى فى المستشفى لسه زى مانا نايم على ضهرى وعلى فكرة انا لسه بنام على ضهرى نفسى اتقلب عالسرير زى زمان المهم لسه متوصل بالخرطوم رايح جاى بيه حتى الحمام بدخل بيه وانا ماسكه زى الفانوس لسه محصلش اى حاجه نايم عالسرير على ضهرى واصحابى والناس بتزورنى و لسه صايم والدكتور النائب مش الجراح -الجراح بيظهر مرة واحده بس فى اوضه العمليات ويختفى تانى- ييجى يبص عليا وعالخرطوم ويدوس على بطنى وتوجعنى ويمشى ...

احنا كل ده عارفين ان الزايده بخرج فى نفس اليوم ومفيش وجع وعادى خالص بس المشكله انه مفيش تحسن وصايم لحد ما بابا راح للدكتور الجراح فى العياده وبيقوله يعنى انت عملت العمليه والولد مبياكلش ولا بيشرب وتعبان لسه قام الجزار رازع المفاجأه الكبرى أن أن أن آآآآآآن

قاله دى مش زايده ده خراج فظيع كان فى بطنه احنا شلناهوله ومليان صديد وبراز

Back to top Go down
View user profile
M@Doo

avatar

Number of posts : 8
Age : 27
Registration date : 2007-08-10

PostSubject: Re: 7ekayti ma3 7'orag el zayda   Fri Aug 31, 2007 3:13 am

عرفت انا كده بقى وكل واحد يطمنى ويقولى ان الخراج اصعب من الزايده ناس طيبين طيبين والله فضلت قاعد فى المستشفى وجابولى راجل طيب وعجوز كده اسمه محمود عبد الباسط معايا فى الاوضه هو مش عيان ومعندوش اى حاجه يادوبك ضغط وسكر والتهاب فى الفقرات والقطنيه وعمل عمليه قلب مفتوح وعمليه تانيه مش فاكر ليه وبلاش اقول عالباقى بقى المهم انه مش عيان قعد يسلينى انا وماى فاذر يعنى بابا ياجهله اللى هو المرافق معايا لحد ما اخرج عايز ابقى ازوره والله ان شاء الله ...

اليوم التالت بقى وبعد عذاب تلات ايام سمحولى بنص كوبايه ميه بعد معاناه من الجلوكوز المشكله مش فى الجلوكوز , المشكله فى الابره اللى بيحطوها كل مايحطوها فى عرق ايدى تورم ويشيلوها ويحطوها فى عرق تانى لحد ماشوهوا ايديا

لأ والوجع هنا مضاعف وجع الابره ووجع البلاستر اللى بيشيلوة من على شعر ايدى يعنى وجع مزدوج

بعد الرعب اللى قولتهولكو ده اخيرا الجزار حن عليا وقرر ييجى يشوفنى جه معملش حاجه بص عالخرطوم وقال للدكتور اللى معاه كلمه بالانجليزى كده وقاله نكتبله انتي بيوتيك والدكتور التانى قاله نديله كذا وكذا قام الجزار قاله تمام كويس اوى وسمحلى اخيرا انى اكل واشرب كل حاجه ( ياللا اسمع الزغروطه المتينه بقى لولولولولولولوى )

بس متفرحوش اوى كده اكتشفت انى ماليش نفس لا اكل ولا اشرب اى حاجه

حتى الفطار اللى جابهولى جابولى سوائل كله تلات حاجات والتلاته مبحبهمش 1-لبن 2-ينسون 3-حاجه غريبه جدا جدا جدا بس عم محمود عبد الباسط طمنى وقاللى انها فراخ مضروبه فى الخلاط بس انا باللى عنده ده كله شكيت انه عنده زهايمر كمان

المهم دلقتهم فى بطنى معرفش ازاى كلهم على بق واحد من غير ما اشم ولا احس وكان فى مفاجأه تانيه بقى ان الدكتور كتبلى على خروج وانى اروحله العياده يوم الاحد ( ياللا اسمع الزغروطه المتينه لولولولوى )

بس متفرحوش اوى كده مش قادر اقوم امشى خدونى عالكرسى المتحرك لحد العربيه وروحت الحمد لله

ومارست حياتى الطبيعيه اللى هيا النوم على ضهرى عالسرير وبدأت المعاناه مش عاوز اكل ودايخ اى حاجه وطبعا كلام بابى ومامى لازم تساعد نفسك ولازم تاكل عشان تخف وكده بقى ومشيت الحياه لحد يوم الاحد الصبح تقيأت معلش باللغه العربيه عشان مقرفه شويه ورحت العياده الساعه 6 والمفاجأه ان الدكتور سافر بره وهيرجع الحد اللى بعديه اللى هو 2\\\\9 والنائب بتاعه هو اللى هييجى قلنا ماشى دخلت المهم لقى الدرنقه اللى هيا البتاعه المتوصله بالخرطوم مخرومه فالبشكل ده مش هتسحب الصديد من بطنى غيرهالى وغيرلى عالجرح وشال البلاستر والنص كيلة قطن طبعا اتعذبت لانه كان عالشعر برضه والبلاستر عالخرطوم كمان فبيتشد معاه والخرطوم متوصل ببطنى يعنى كنت بتعذ من الاخر

والمفاجاه شفت المنظر المرعب شفت الخياطه اللى فى بطنى بس الخياطه عادى اصلى خيطت دماغى قبل كده - معلش سوابق بقى - وشفت بقى الخرطوم اللى كنت محتار متوصل ببطنى ازاى لقيت خرم فى بطنى داخل جواه الخرطوم متخافوش انا خلاص مبقتش تفرق معايا الحاجات دى
Back to top Go down
View user profile
M@Doo

avatar

Number of posts : 8
Age : 27
Registration date : 2007-08-10

PostSubject: Re: 7ekayti ma3 7'orag el zayda   Fri Aug 31, 2007 3:17 am

وغيرت عالجرح وقاللى اروحله الاربعاء روحت بس الدرنقه انا كنت ملاحظ انها مبتسحبش صديد افتكرت انى خفيت والصديد خلص بس حسيت ان مكان الخياطه بيورم قلت ابقى اسال الدكتور بس يوم الاربعاء الفجر وانا نايم فى امان الله شميت ريحه غريبه , ريحه موصفلكمش القرف قعدت اشم كده وكده مش عارف جايه منين بحط ايدى على بطنى لقيت بس اوعوا تخافوا لقيت ان الصديد بيطلع من بين الخياطه بيطلع بغزاره - حلوة بغزاره دى -والصديد عمال ينزل وانا امسح فيه ومبيخلصش انا ساعتها قلقت و اتشاهدت على روحى لان الصديد عباره عن سموم وانا قلت انها مبتطلعش من الدرنقه وان الصديد فى بطنى والسم يجرى بين عروقى يبقى هتسمم ويالا مع السلامه

طبعا مامى قلقت جدا ومكانتش قادره تقف ام بابى واخدنى عالمستشفى اللى عملنا فيها العمليه ودخلنا من الطوارئ وانا هدومى متغرقه من الصديد والدم الفاسد اللى طالع من بطنى المهم بابا بيقول للولد اللى قاعد اننا ندخل فراح للدكتور اللى كان موجود ساعتها والدكتور قاله انها مش حاله طوارئ خليه ييجى الصبح وكمان هو مش الحاله بتاعتى طبعا الولد قال لبابا كده وكنا هنعمل مشكله لحد ما جه ممرض ودخلنا مقولكمش عاللى حصل بقى

شفتوا العذاب اللى انا قلتهولكوا ده كوم والعذاب ده كوم تانى قاللى عايزك تستحملنى شويه انا قلت ااااه عذاب تانى بس مكنتش اتوقع انه كده فضل يدوس على بطنى مكان الجرح و نافوره من الصديد بتطلع من بين الغرز انا مش قادر اوصفلكو بجد كميه الصديد كان بيطلع لغايه فين وكان اد ايه فضل يدوس ويدوس والصديد عمال يطلع من احد الغرز لحد ما فجأه قامت منطوره من الغرز التانيه ونافوره تانيه وبهدله وانا عمال اتوجع جدا الحد ماالصديد خلص وطلع الدم الفاسد ومقولكمش عالريحه اصعب ريحه شمتها فى حياتى والحمد لله خلص ورش مطهر عالجرح وقام مغير عليه قطن وبلاستر يعنى ..

روحت البيت بعد العذاب ده بس ارتحت لانى كنت فاكر خلاص هموت نمت وصحيت متاخر عالساعه 6 كده رحت للدكتور النائب برضه لان الباشا الجزار لسه مسافر وحكيناله عاللى حصل وطمنا وقالنا ان ده عادى وعمل زى الممرض برض وقعد يدوس ويطلع الدم الفاسد انا متوجعتش زى اول مرة خلاص اتعودت بقى بس العذاب الجديد بقى ان الفرق ان الدكتور كان بيفتح المسامات عشان يخرج الصديد والدم بس بيفتحها ازاى بقى اهو ده العذاب كان بيقص الجلد بالمقص عذاب بقى قص حوالى 3 : 4 مرات وقام راشش المطهر برضه وشالى الدرنقه كنت فاكر هتوجعنى بس بعد اللى حصلى ده كله مبقتش بتاثر الحاجات دى المهم شال الخرطوم والدرنقه دى وكان فى خرم فى بطنى مكانه بس هما بيقولولى انه هيلتئم من نفسه مش عارف ازاى وغيرلى عالجرح برضه وقاللى اجيله يوم السبت اللى هو بكرة وقال عادى ممكن يكون لسه فى صديد يعنى لسه هتعذب تانى

ادعولى بقى لحد بكره انه ميحصلييش عذاب جديد وانى اقوم بقى

معلش طولت عليكوا بس انا حبيت اوريكو مدى العذاب وبعتذرلكوا انى مكنتش قادر اكلم حد لحد ما اخف خالص

وعاوز اشكر كل الى جم زارونى وكل اللى اتصلوا بيا واطمنوا عليا

وفى النهايه عاوز اقولكوا محدش ياكل حاجه من الشارع وخصوصا من سامى تلوث لان العذاب ده كله بسبب ساندوتش
Back to top Go down
View user profile
a.aTeYa



Number of posts : 62
Age : 28
Location : eGYPT
Registration date : 2007-08-10

PostSubject: Re: 7ekayti ma3 7'orag el zayda   Fri Aug 31, 2007 5:00 am

ربنا معاك يا عادل و الله
و راجل يا واد انت ادها و ادود
و الله انا لما لقيت موضوعك قلت الواد خف خلاص بقى و هنقضيها زغاريط فى المنتدى اللى انا بطلت ادخله ده
بس هنستناك عشان نشوف مصيره ايه
و الف سلامه عليك يا بطل و ان شاء الله مافيش صديد تانى
و بطل عمك سامى تلوث بقى

_________________
_a.aTeYa_
tHe DiffeReNce MaKeR
Back to top Go down
View user profile
noly

avatar

Number of posts : 25
Age : 27
Registration date : 2007-08-10

PostSubject: 7amdellah 3ala el salama   Fri Aug 31, 2007 7:53 am

حمد لله ع السلامه يا عم مادو والف الف الف سلامه عليك ويارب تقوم كده بالسلامه ان شاء الله ويكون بكره مفيش وجع ولا حاجه والدكتور يتوصى بيك بس ياعم ما تخضناش عليك كده تانى ورد علينا حتى وان شاء الله بعد بكره هاترجع زى الاول واحسن كمان وهاتقول اختى قالت Wink
ويلا بقا عشان تملى المنتدى كده وتشغله عشان فاضى منغير يا مادو يلا خلى بالك من نفسك وحمد لله ع السلامه تانى
Back to top Go down
View user profile
M@Doo

avatar

Number of posts : 8
Age : 27
Registration date : 2007-08-10

PostSubject: Re: 7ekayti ma3 7'orag el zayda   Fri Aug 31, 2007 1:35 pm

الله يسلمكوا يا عطيه ويا نولى ومعلش انا مكنتش برد عشان صوتى مكنش بيطلع اساسا بس ان شاء الله خلاص هبقى ارد وياللا نملى المنتدى شغل يا شباب
Back to top Go down
View user profile
a.aTeYa



Number of posts : 62
Age : 28
Location : eGYPT
Registration date : 2007-08-10

PostSubject: Re: 7ekayti ma3 7'orag el zayda   Fri Aug 31, 2007 5:17 pm

M@Doo wrote:
الله يسلمكوا يا عطيه ويا نولى ومعلش انا مكنتش برد عشان صوتى مكنش بيطلع اساسا بس ان شاء الله خلاص هبقى ارد وياللا نملى المنتدى شغل يا شباب


ولا يهمك يا باشا شد حيلك انت بس كده و ارجع و كله هيبقى تمام

_________________
_a.aTeYa_
tHe DiffeReNce MaKeR
Back to top Go down
View user profile
sweer Heart



Number of posts : 5
Registration date : 2007-08-12

PostSubject: Re: 7ekayti ma3 7'orag el zayda   Sat Sep 01, 2007 5:45 pm

حمد الله على سلامتك يا عدوول وان شاء الله مفيش عذاب تانى ومفيش نوم على ضهرك تانى ان شاء الله
و دة عشان تحرم تاكل من الشارع يا بشمهندس
Back to top Go down
View user profile
Sponsored content




PostSubject: Re: 7ekayti ma3 7'orag el zayda   

Back to top Go down
 
7ekayti ma3 7'orag el zayda
Back to top 
Page 1 of 1

Permissions in this forum:You cannot reply to topics in this forum
sHaBaB mo5talif :: GeNeRaL :: PUBLIC-
Jump to: